المحتاره مشكلتك بدون اسم ..... في سريه تامة


الست مفيدة
مشاركة
المحتاره مشكلتك بدون اسم ..... في سريه تامة  293bkgx


انا حابه اتكلم معاكم شويه اخرج النار الي جوايا ويمكن و حده منكم تعرف تفسرلي الوضع الي انا عايشه فيه ده ايه بالضبط
بصو بقي انا متجوزه من فتره ولسه معنديش اطفال جوزي الي حد ما كويس من ناحية موضوع الخلفه ده وبيقول كله بتاع ربنا بس الي تاعبني ومعيشني ف نار احواله الغريبه جوزي انسان طويل البال جدا جدا معايا او مع اهله من حيث اي شي يخصنا ويجري ويعمل كل الي ربنا يقدره عليه مع الغرب مثلا
لو فيه حاجه ف البيت عايزه تتصلح حنفيه او لمبه اوي اي حاجه افضل اتحايل عليه بالشهر والاتنين ويقول ماشي هعملها ويطنش وميعملهاش غير لما نتخانق والناس كلها تعرف ان فيه مشكله بينا لاكن لو حد من اصحابه او حتي الجيران قله عايز اعمل حاجه ف البيت متعرف صنايعي مثلا يجري ويقوله اه ويفضل يتصل بالصنايعي ويجيبه ويروح معاه كمان وف ظرف ساعه تكون كل حاجه متصلحه وتمام تصدقو لمبة المطبخ بقالها شهر واكتر مش راضي يغيرها وبطبخ عل الضلمه بنور الطرقه علشان تدخلي شوية نور علشان بس اشوف الحاجه فين تخيلو كانت خطوبة ابن اخوه ما شاء الله ضابط شرطه وبيحبه اوي وقعد ياكد عليه اكتر من اسبوع انه لازم يحضر ويوم الخطوبه بجهز الهدوم الي هنروح بيها افتعل مشكله معايا عل البنطلون وحلف ما حنا رايحين واتاريه واحد يعرفه عزمه عل فرح واحد قريبه ف نفس اليوم فطبعا فضل فرح الغريب عل ابن اخوه وتخيلو فرح واحد بلطجي وجري وراح وطنش ابن اخوه لدرجة ان حماتي قالتلي ان الولد اجل قراية الفاتحه اكتر من ساعه علشانه مفكره هيروح تخيلو كمان مره ابن اخته اتخانف مع واحد وراحو القسم واخته كانت منهاره وبتكلمو وتقولو روح شوف الولد قالها ماشي وكبر دماغه ومرحش تاني يوم بيكلم واحد صاحبه فقاله انا ف القسم مع واحد جاري فجوزي يقوله ايه استناني انا جاييلك صاحبه يقوله هتجيي تعمل ايه انا خلاص ماشي والله كان قرب يحلف عليه يستناه وبيلبس وهو بيكلمه ويجررري ويقوله انا جاي انا جاي وانا قاعده باكل ف نفسي طب صاحبك بيجامل جاره انته مالك
والله يابنات مره جوز عمتي جه عندي احنا ف محافظه من محافظات الصعيد وعمتي عايشه ف القاهره المهم جه يزورني هو مربيني وانسان كويس ومحترم ولما بروح القاهره انا وجوزي بننزل عندهم والراجل مبيقصرش معانا ابدا هو راجل مقتدر وكباره
المهم جه ولسه يادوبك بنرحب بيه كان هو وعمي وجوزي تليفونه رن طلع واحد ف العماره الي قصادنا فبيقوله ممكن تديني تليفون سباك علشان حوض المطبخ عندي مسدود لقيته بيقوله انا هكلمهولك وهجيبه والراجل والله العظيم عمال يحلف عليه انه يديه النمره بس وهو ابدا وساب الضيوف ودخل الاوضه وقعد يرن عل السباكين اصل هو يابنات علاقاته كتيره اووي وعنده يمكن اكتر من 3000 نمره عل تليفونه المهم قالي نازل فضلت اضرب ف نفسي جوه الاوضه سايب الراجل ورايح فين يقولي ده ثواني هشاور للسباك عل الشقه ونزل والله طلعت فراخ من التلاجه وعملت ملوخيه ورز وسلطه وعشيت عمي وجوز عمتي وشربو الشاي والاستاذ مجاش راح جوز عمتي قالي خلاص يابنتي لازم امشي علشان هسافر الصبح بدري اشكري جوزك وانا كنت ف نص هدومي وارن عليه مش بيرد المهم طلعت البلكونه تخيلو الاقيه ف شقة الناس الي قصادنا مع ان والله مش بيكلمونا خاله وحتي لو اتصادفنا ف البلكونه مش بيسلمو حتي من كتر الغيظ ندهت عليه بعلو صوتي جه والناس عالباب ماشيين واليوم انتهي بخناقه زي كل مره
انا مش عارفه ايه البني ادم ده كرهني ف نفسي وف الدنيا كلها تخيلو نبقا خارجين نتفسح واول ماحد يرن عليه ويقوله انا مثلا بشتري جزمه مثلا يقوله خليك عندك انا جاييلك ويقولي مش هتاخر وارجع نخرج وطبعا ما بيحصلش تخيلو ناقلين ف شقه من اربع شهور وعمليش وصله الغساله وبغسل عالهاف وكمان مش جاييبلي خرطوم بملي بالجردل لما ظهري بيموتني من التعب ووحده جارتي وصلة غسالتها باظت فجوزها بيقوله المدام الغساله غلبتها النهرده والوصله باظة راح وهما قاعدين علطول قاله يالا انا اشوفهاله وطلع معاه شقتهم وصلحلها الوصله
انا خلاص زهقت منه وكرهته وكرهت حياتي
ايه الحل انا محتارة ....


نتشرف بزيارتكم في منتدنا ومدونة الطبخ الأحترافي علي جوجل( طبخ الست مفيدة )
وشاهدوا احلي وصفات ونصائح الدبير المنزلي والعناية والجمال علي
قناة الست مفيدة علي اليوتيوب وكون اول المشتركين بالقناة ودوس علي الجرس يصلكم
اشعارات القناة
مع السلامة