همسه اليكى صلاتك حياتك


ام حبيبه
مشاركة
ظبطى المنبه
على خمسه الفجر و نمتى زى الفسيخة اللى عندها غيبوبه .. صحيتى و أنتى متخدره بعد ما المنبه رن 4 مرات تطفيه و كملتى تخاطيف نوم صح ؟؟ .. عملتى الساندوتشات و قعدتى تفننى يمكن العيال ترضى تاكل و مترجعش بالاكل و لا يرموه و يحرقوا دمك ؟؟ تممتى على الجداول و اتأكدتى أن معاهم الاقلام اللى بتنور و المساطر اللى بتغنى و البريات اللى بترقص عشره بلدى يمكن يحبوا المدرسه ؟؟ جالك ذبحة صدريه و برى برى و انتى بتصحيهم شويه بالبوس و المحايله و شويه بتحديف الشباشب ؟؟ لبستيهم و بوستى ايديهم و رجليهم و شعر حواجبهم علشان ياكلوا البيضه المسلوقة و يشربوا بق لبن ؟؟ لبستى الاسدال بالمشقلب و نزلتى البنت للباص و طلعتى غيرتى هدوك و صحيتى جوزك و فطرتيه و خدتى الولد ودتيه الحضانه ؟؟ رجعتى من بره حطيتى غسله شطبتى المواعين و عملتى الغدا و شفتى المسلسل التركى انتى بتطبقى ؟؟؟ نزلتى جبتى ابنك و خدتى البنت من المدرسه و طلعتوا على النادى غيرتيلهم و اكلتيهم و عملتوا نص الواجب و اتمرنوا و رجعت الساعه 6 و انتى دماغك قد بطيخه حامل ؟؟ غديتى جوزك و حميتى العيال و قعدتى تذاكريلهم ؟؟؟ دخلتى جروبات الواتس بتاعه المدرسه و سلختى ودن بنتك علشان منقلتش من على البورد ؟؟؟ نيمتى العيال و عملتى الاكتيفتى اللى مطلوب بكره و كويتى هدوم المدرسه ؟؟ كلمتى مامتك و اطمنتى عليها ؟؟ عيدتى على صاحبتك علشان عيد ميلاد بنتها و سلمتى على حماتك اللى لسه راجعه من السفر ؟؟ قعدتى مع جوزك اللى شايف انك بتعامليه زى الضفدع المحول و بينتي له أنك بتموتى فى غرامة ...
رضيتى الكل صح .. و اتفرمتى مش كده ..تعرفى كل دول عاوزين منك حاجه جوزك عاوز يتخدم و يتدلع , ولادك عاوزين مساعدتك علشان يتنفسوا , أصحابك عاوزين أهتمامك , و أهلك عاوزين حبك ..علشان تعملى كل ده اتهلكتى و نسيتى أهم حد ..نسيتى نفسك و أهم حاجة تفتكرى بيها نفسك أنك تصلى ,,أه تصلى مستغربه ليه .. تصلى الصلاه اللى كومتيهم اتنين اتنين و فوتى واحده حتصليها مع فرض بكره .. تصلى و انتى خاشعة مخك مش فى درس الساينس اللى الواد مش فاهمه و لا حله المحشى اللى ناويه تعمليها يوم الخميس و لا العيال اللى بيضربوا بعض .. تصلى علشان ترتاحى من الهموم و المسؤليات و تدعى بقلب ان ربنا يحفظ لك بيتك وولادك
الكل يريدك لنفسه الا الله يريدك لنفسك .. كلهم عاوزين منك حاجه الا ربنا عاوزكعلشان يديكى و يرضى عنك و يرفعك درجات فى الجنه
فلا تنشغل بما انت له عمن هو لك ..أوعى اوعى تتلهى باللى عاوزينك لمصلحتهم حتى و هما مش قاصدين عن اللى دايما معاكى و ليكى حتى و انتى مقصرة
ربى اجعلنى مقيم الصلاة و من ذريتى .. ربنا و تقبل دعاء
منقووووووووووووووووووول
منى ليكى منى ليكى منى ليكى منى ليكى


همسه اليكى صلاتك حياتك 2192m1z